Поради обилни снежни врнежи, ниски температури и силни ветрови, училиштата во Грција денес ќе бидат затворени во неколку региони, некои фериботски линии ќе бидат суспендирани, а поради бурните ветрови, на сила е забрана за бродови што излегуваат од пристаништата Пиреја, Рафина и Лаврио, објавија грчките власти.
Поради најавениот студен фронт проследен со силна бура, сите училишта во регионот Атика ќе останат затворени во среда, јавуваат грчките медиуми. Одлуката е донесена како превентивна мерка за заштита на учениците и наставниот кадар од екстремните временски услови што се очекуваат во текот на денот.
Затворањето се однесува на сите јавни и приватни основни и средни училишта, вклучително и вечерните програми, а наставата ќе се реализира онлајн. Регионалниот гувернер на Атика, Никос Хардалиас, изјави дека областа е ставена под црвена тревога, нагласувајќи дека ризикот не е во вкупната количина на врнежи, туку во нивниот интензитет.
Грчката национална метеоролошка служба издаде итно предупредување за силни дождови и грмотевици во централните и јужните делови на земјата, како и за обилни снежни врнежи во планинските подрачја. Се очекуваат и бурни ветрови, особено во источниот и јужниот Пелопонез, Атика, Евија, Спорадите, северниот и источниот дел на Егејското Море и Додеканезите, при што временската непогода ќе трае најмалку до четврток.
Бурата во регионот Атика, кој ја опфаќа и Атина, се очекува да го достигне својот пик во среда попладне. Во меѓувреме, поради силните ветрови, суспендирани се фериботските линии кон и од островите Закинтос и Кефалонија, а затворена е и фериботската линија Рио–Антирио. Преку мостот е дозволен сообраќај само за патнички возила и целосно натоварени камиони.
Метеоролозите најавуваат снежни врнежи во планинските и полупланинските области на Пелопонез, Епир, Централна Грција, Тесалија, Македонија и Тракија, при што најобилниот снег се очекува во западна Македонија и во регионите Трикала, Кардица и Евританија.
Властите апелираат до граѓаните да бидат внимателни, да ги следат официјалните известувања и да избегнуваат непотребни патувања додека траат неповолните временски услови.