Во силната експлозија која уништи трикатна зграда во атинската населба Плака загинаа најмалку две лица, додека по уште четири лица се трага.
Несреќата се случи во историскиот центар на градот, во мала улица сместена меѓу познатите туристички атракции Акропол и храмот на Зевс.
Животот го загубија маж и жена од Соединетите Американски Држави. Телото на жената е извлечено од урнатините во саботата наутро, додека пожарникарите набргу потоа потврдија дека е пронајдено и телото на мажот.
Меѓу исчезнатите се уште двајца американски туристи, чие исчезнување е пријавено во полиција откако не се појавиле на летот од атинскиот аеродром. Покрај нив, се трага и по еден државјанин на Грција и еден државјанин на Велика Британија кои живееле во зградата.
Истрагата се сомнева дека причината за трагедијата е истекување на гас. Силата на експлозијата била толку голема што зградата, во која се наоѓал апартман за туристичко изнајмување, целосно се урнала.
Оштетени се и соседните објекти, а остатоците расфрлани по околните улици повредиле неколку лица, поради што е наредена и евакуација на одредени згради.
На терен се наоѓаат итните служби кои со помош на багери и термални камери ги пребаруваат урнатините, во надеж дека ќе пронајдат преживеани.
Градоначалникот на Атина, Харис Дукас, го опиша настанот како „неверојатна катастрофа“.