Два дена пред изрекувањето на пресудата за поранешните лидери на ОВК во Хаг, на зградата на општината Липљан беше поставено огромно знаме на таа организација.
Истовремено, во Приштина и во другите градови во Косово се интензивира кампањата за поддршка на обвинетите, поради што „Српската листа“ бара дополнителни безбедносни мерки.
Видео снимката од поставувањето на знамето на зградата на општината Липљан беше објавена од градоначалникот на тоа место, Имри Ахмети, само 48 часа пред одлуката на Специјализираните совети во Хаг.
Изрекувањето на пресудата за поранешните лидери на ОВК – Хашим Тачи, Кадри Весели, Реџеп Селими и Јакуп Красниќи е закажано за 16 септември.
На нив им се суди пред Специјализираните совети во Хаг под обвиненија за воени злосторства и злосторства против човештвото.
Поставувањето на знамето се случува во време кога се одвиваат активности насочени кон величање на ОВК и нејзините поранешни лидери.
Во саботата се одржа и собир за поддршка на обвинетите, на кој, според достапните информации, беа упатени и закани во случај пресудата да биде осудителна.
На главниот плоштад во Приштина е поставен и часовник што го одбројува времето до изрекувањето на пресудата.