Италијанскиот министер за одбрана Роберта Пиноти изјави дека независно од сериозното влошување на времето, спасувачката операција за патниците на фериботот „Норман Атлантик“ во Јадранското Море ќе продолжи и во текот на ноќта, јави ТАСС.
Пожар избувна денеска на палубата за автомобили на ферибот, што пловел од грчкото пристаниште Патра кон италиајнското Анкона. Со фериботот патувале 422 патници и 56 членови на екипаж.
Грчките и италијанските спасувачки бродови се обидуваат да стигнат до оштетениот ферибот, кој се движи кон албанскиот брег поради ветрови што достигнуваат до 90 километри на час.
Министерството за одбрана на Албанија и Генералштабот, исто така, се вклучија во акцијата.
Италијанските власти и официјално потврдија дека едно лице загинало на фериботот „Норман Атлантик“, а две се повредени. Италијанскиот премиер Матео Ренци поради инцидентот го прекина одморот и се врати во Рим.
Досега спасувачките екипи имаат евакуирано 156 патници.
Претходно албанските медиуми објавија дека меѓу вкупно 478 патници на грчкиот ферибот „Норман Атлантик“ се наоѓаат и тројца македонски, 25 албански, 54 турски, 22 италијански, 34 грчки, 18 германски и по еден или повеќе државнјани на други земји, додека 234 се грчки државјани.