Суд во Романија денеска го осуди поранешниот министер за финансии Дариус Валцов на шест и пол години затвор за земање мито во замена за политичко влијание при доделувањето јавни договори.
Валцов (43) беше министер за финансии во 2014-2015 година во владата на Виктор Понте, а беше и економски советник на социјалдемократската влада, градоначалник на родниот град Слатина и сенатор, како и автор на бројни контроверзни закони за даноци. За време на судењето, тој ги негираше сите обвиненија.
Пресудата сè уште не е правосилна, затоа што Валцов има право на жалба.
Во 2018 година, Валцов беше осуден во посебен судски процес на осум години затвор за перење пари. И двата случаи се поврзани со одобрување јавни договори, додека Валцов беше градоначалник на Слатина, на југот на земјата, од 2004 до 2012 година.