Неколку реки во Босна и Херцеговина, воглавно на подрачјето на Република Српска, по повеќедневните поројни дождови се излеаја денеска од своите корита и поплавија куќи и улици во одредени населени места, како и некои локални и регонални патишта.
Според последните податоци на хидролошките станици, критичното ниво на водата е надминато во реките Уна, Сана, Врбас и Босна.
Во Приједор е прогласен прв степен на готовност за заштита од поплави, откако Сана се излеа и поплави околу стотина станбени објекти и земјоделски површини, а патната комуникација е во прекин.
Водостојот на Сана изнесува 445 сантиметри или 25 сантиметри над критичната точка, а се очекува и натамошен раст на водостојот со оглед на врнежите на сливното подрачје на оваа река.