Повеќе од девет часа по апсењето од страна на припадниците на Државната агенција за истраги и заштита (СИПА) во Сараево, пратеникот на Партијата за демократска акција (СДА) во Парламентот на БиХ Шемсудин Мехмедовиќ е ослободен, соопшти неговата адвокатка Сенка Ножица.
– СИПА ги достави материјалите и господинот Мехмедовиќ го изнесе пред државниот обвинител. Обвинителот му зема изјава во врска со истрагата која ја води против него, по што му рече дека е слободен и нема да предложи притвор. Доколку постапката продолжи, Мехмедовиќ ќе се брани од слобода и тоа е се што знаеме засега, истакна Ножица.
Таа нагласи дека не можело да му биде одреден притвор бидејќи обвинителството нема доволно докази.
Мехмедовиќ е уапсен во рамки на акцијата наречена „Озрен“, под сомнение дека е одговорен за извршени воени злосторства врз цивилно население, односно затворање и малтретирање на лица од српска националност во Станицата за јавна безбедност на Општина Тешањ од пролетта 1992 година до есента 1993 година.