Окружното обвинителство во Пловдив поднесе обвиненија против втор осомничен за убиството на бугарскиот бизнисмен Илијан Филипов.
Осомничениот е 42-годишен маж, обвинет за помагање во извршувањето на кривичното дело; по налог на надлежниот обвинител, тој е задржан во притвор во траење до 72 часа.
Обвинителството наскоро ќе поднесе барање до судот за определување мерка притвор како превентивна мерка.
Филипов (53) беше убиен во раните утрински часови на 30 септември 2026 година, во Пловдив. Според бугарските медиуми, тој бил застрелан околу 01:00 часот по полноќ на паркингот пред станбената зграда во која живеел. Полициски и медицински екипи пристигнале на местото на настанот по добиен повик, но можеле само да ја констатираат смртта на бизнисменот.
Претходно, за убиството беше обвинет 51-годишниот Славчо Мегеров, кој беше уапсен во Софија неколку часа по извршувањето на делото. Тој се товари за умислано убиство, извршено со предумисла.
Според Обвинителството, Мегеров и Филипов се познавале долго време, а како можен мотив за убиството се наведуваат нерасчистени финансиски спорови меѓу нив. Бугарските медиуми објавија дека Мегеров претходно работел за убиениот бизнисмен.
На 6 ноември, истражителите го пронајдоа и огненот оружје употребено при убиството на Филипов. Оружјето е одземено и приложено како материјален доказ во предметот. Филипов беше добро познат во бугарските деловни и фудбалски кругови. Тој беше сосопственик на транспортната и градежна компанија „ПИМК“ (PIMK), а беше поврзан и со фудбалскиот клуб „Ботев Пловдив“, чиј сопственик стана во 2025 година.
Истрагата за убиството е во тек, а Обвинителството ја испитува и можната вмешаност на други лица во кривичното дело.