Полицијата во Хрватска спроведе кривична истрага против тројца обезбедувачи на хотелот „Кемпински“ во Истра, на возраст од 19, 46 и 57 години, поради бруталниот напад врз двајца млади Словенци на плажата во Истра.
Инцидентот се случил на 15 август околу 23:30 часот во областа Умаг, каде тројца мажи, кои работеле како обезбедувачи, им се приближиле на 28-годишен Словенец и 25-годишна Словенка поради наводно непочитување на куќниот ред на туристичкиот објект.
По вербалниот конфликт, 46-годишникот забележал дека младиот човек го снима, му го фрлил мобилниот телефон,а потоа и него на земја. Потоа сите тројца почнале да го удираат 28-годишникот со раце и нозе. Кога девојката се обидела да ги спречи, 46-годишникот ја удрил со рака, а 57-годишникот ја удрил во главата со телескопска палка.
После тоа, тие продолжиле да го тепаат младиот човек, по што избегале од плажата, соопшти полицијата.
Против тројца мажи се поднесени кривични пријави за насилно однесување, а 46-годишникот дополнително се товари за оштетување туѓ имот, додека 57-годишникот се товари и за обид за нанесување тешка телесна повреда.
Полицијата за случајот го известила инспекцискиот надзор на Дирекцијата за цивилна заштита. Утврдено е дека двајцата напаѓачи немале дозвола од МУП за вршење работи на приватно обезбедување, па против нив се води прекршочна постапка.
Казната му се заканува и на хотелот што ги вработил затоа што им дозволувал на луѓето да работат без пропишана дозвола. За третиот човек, кој имал дозвола, ќе се спроведе проценка на законитоста на неговите постапки.