Србија е подготвена да посредува во решавањето на отворените прашања меѓу Грција и Македонија, изјавил денеска во Солун српскиот претседател Томислав Николиќ.
На средбата со новинарите, сумирајќи ја посетата на Грција и разговорите со грчкиот државен врв, Николиќ истакнал дека ако има расположение и таква иницијатива, Белград може да посредува меѓу Атина и Скопје.
– Можете да замислите како би изгледало се ако сите соработуваме. Тоа би било потпорен столб на Балканот, а можеби и на цела Европа, изјавил Николиќ.
Тој, како што пренесува Танјуг, ја оценил српско-грчката соработка како одлична, без отворени прашања, посочувајќи оти Грција ја поддржува Србија на патот кон ЕУ, без никакви условувања.
– Очигледно дека Србија може да биде мост меѓу Истокот и Западот и Северот и Југот. Ние го обновивме и утврдивме тоа што Србите и Грците отсекогаш го имаат, а тоа е целосно разбирање и соработка, односи кои со ништо не се нарушени, безмалку се како една држава, изјавил српскиот претседател.
Претседателот на Србија Томислав Николиќ при неодманешната посета на Македонија изрази подготвеност за посредување и во решавањето на проблемите меѓу Српската и Македонската православна црква.