Во заедничка акција на полициите на двете земји, во текот на минатата ноќ на грчко-албанската граница запленети се 141 килограми марихуана и уапсени тројца албански државјани.
По добиените сознанија за обид за шверц на дрога на потегот Чифлиг-Катајето, албанската полиција добро се организирала, а за тоа ја информирала и грчката погранична полиција, јави дописникот на МИА од Тирана.
По неколку часа потрага албанската полиција ги лоцирала нарко-дилерите кои веќе биле во близина на границата. Кога ја забележале полицијата го напуштиле автомобилот марка „мерцедес“ со кој се движеле и заедно со дрогата успеале да преминат пеш на грчка територија. Кусо потоа биле уапсени од страна на грчката полиција, која ја запленила дрогата.
Уасени се Лутфим Терполари, Анарилдо Чегени и двајцата од Саранда, како и Зани Чиколари од Корча. Истрагата продолжува, бидејќи полициите се сомневаат на вмешаност и на други лица.
Од почетокот на годинава албанската и грчката полиција имаат запленето околу 1,5 тони марихуана, која требало да заврши на грчкиот нарко пазар.