Нова демократија беше, е и секогаш ќе биде против каков било облик на опсади, вели претседателот на најголемата грчка опозициска партија, Кирјакос Мицотакис во однос на мобилизацијата на учениците во Северна Грција и опсадите во средните училишта поради Договорот од Преспа.
– Целосно ја разбирам огорченоста на оние кои денес одбираат да бидат против лошиот Договор од Преспа што го потпишаа господинот Ципрас и господинот Каменос. Но, затворени училишта значи затворени умови, вели Мицотакис и додава дека тој во никој случај не би сакал здравиот патриотизам некои да го претворат во радикален национализам.
Мицотакис потенцира дека треба сите заедно да бидат против оние кои сакаат да ја радикализираат новата генерација, а оние кои се против Договорот од Преспа, нивното незадоволство да го изразат на демократски начин.
– Секој Грк и секој млад има право да протестира против овој лош договор. Но, тоа да го направи задржувајќи ги училишта отворени и секогаш почитувајќи ги демократските институции на нашата татковина, рече лидерот на Нова демократија.