Ако се придржуваме до нашиот план, на крајот на мај, можеме да се доближиме до пет милиони, рече грчкиот премиер Кирјакос Мицотакис на почетокот од денешната владина седница, јави дописничката на МИА од Атина.
Грчкиот премиер истакна дека седмицата пред Велигден се совпаѓа со напорите на Владата за „безбеден Велигден и слободно лето“.
-Првите знаци се охрабрувачки. Повеќето наши сограѓани покажуваат дека ја разбираат важноста да се избегнат велигденските патувања. И сите зрело и дисциплинирано го пречекаа постепеното отворање на одредени економски активности. Во исто време операцијата „Слобода“ се проширува, од утре и 30-годишните ќе влезат во битка. Се приближуваме до три милиони вакцинации. И ако се придржуваме до нашиот план, на крајот на мај, можеме да се доближиме до пет милиони, рече Мицотакис.
Истакна дека „најдобрата вакцина е брзата вакцина“, односно уште еднаш ги повика, особено постарите да побрзаат да се вакцинираат што е можно побргу.
Во однос на економијата, рече дека последната надградба на кредитната способност на Грција покажува дека земјата е на вистинскиот пат.