Претставниците на парламентарните партии во Република Српска по денешниот состанок со членот на Претседателството на БиХ, Милорад Додик, не сакаа да откријат детали од двете законски решенија со кои ќе одговорат на одлуката на Високиот претставник за БиХ, Валентин Инцко.
Откако Инцко минатата недела донесе одлука да се воведе ново кривично дело „негирање на геноцидот“ и да се забрани величањето на осудени воени злосторници, српските политичари од Босна ќе одговорат со воведување затворска казна за секој што ќе ја нарече Република Српска или српскиот народ геноцидни, откриваат босанските медиуми.
Со второто законско решение, ќе се отфрлат сите одлуки кои ги наметнал Високиот претставник на меѓународната заедница во БиХ.
Додик денеска изјави дека седницата, закажана за петок, ќе биде затворена за јавноста.
По денешниот состанок, било одлучено и српските претставници да се повлечат од сите тела и институции на Босна и Херцеговина, во знак на протест против одлуката на Инцко.