Поранешниот претседател на Хрватска Иво Јосиповиќ изјави дека лидерот на српските радикали Војислав Шешељ нема потенцијал да го дестабилизира регионот, но внесува немир, додека изјавите на претседателот и премиерот на Србија Томислав Николиќ и Александар Вучиќ по палењето на хрватското знаме ги оцени како коректни и дека покажуваат желба за продолжување на соработката.
Јосиповиќ во интервју за „Данас“ нагласи дека Шешељ е обвинет за најтешки злосторства и дека без оглед на пресудата, тој останува еден од протагонистите на говор на омраза и воен поттикнувач.
– Не треба да го преценуваме потенцијалот на Шешељ за дестабилизирање на регионот, не е тој толку важен, ниту толку моќен, но сигурно внесува немир и го расипува односите меѓу луѓето и државите, истакна Јосиповиќ.
Јосиповиќ коментирајќи ги изјавите дека привременото пуштање на слобода на Шешељ, но и враќањето во Хаг е насочено кон дестабилизирање и уривање на српската влада, истакна дека не може да ги разбере таквите изјави, бидејќи обврска на секоја држава е да ги почитува наредбите на судот.
– Србија со исполнување на наредбата ќе ја докаже својата сила и приврзаност кон меѓународно прифатените вредности и меѓународното право. Заминувањето на Шешељ во Хаг, сметам дека нема ниту малку да и наштети на Србија и нејзината влада, истакна Јосиповиќ.