Студенти кои учествуваат во блокадата на Филозофскиот факултет во Нови Сад соопштија дека синоќа биле нападнати, при што неколкумина од нив се повредени, пренесува 021.rs. Нападот, според нивните наводи, се случил околу три часот наутро.
„Една студентка е тешко повредена и моментално се наоѓа на лекување во Клиничкиот центар во Војводина. Има изместена вилица и повреди на телото. Неколку студенти се здобиле со полесни повреди, а лекарите во моментов ја проценуваат нивната состојба“, се вели во соопштението на студентите од Филозофскиот факултет.
Тие додадоа дека четворица мажи, вооружени со безбол палки, нападнале група студенти кои ставале налепници и цртале матрици со порака „Три месеци, три моста“. Оваа порака е поврзана со најавената блокада на три моста во Нови Сад, закажана за сабота на 1 февруари, точно три месеци по уривањето на настрешницата на Железничката станица во Нови Сад.
Од Клиничкиот центар на Војводина за 021.rs потврдија дека дијагностиката за тешко повредената студентка се уште е во тек.