Претседателот на албанското собрание, Илир Мета во тек на средбата со американскиот сенатор Кристофер Марфи во Тирана изјави дека за Албанија и Србија е поважно да постигнат заедничка европска иднина, од еден фудбалски натпревар.
Според неговите зборови Тирана е отворена за дијалог и конкретна соработка со Србија, како и со другите држави во регионот.
-Ја поздравуваме посветеноста на Србија во функција на регионална соработка и стабилност, во најдобар интерес за двата народи и нашите граѓани, што може да се постигне единствено преку конструктивен дијалог и дистанцирање од непотребната националистичка реторика, која служи за да не врати во историјата – рече Мета.
Во тек на посетата на Албанија, Марфи се сретна и со шефот на албанската дипломатија Дитмир Бушати со кого исто така разговараше за напнатата ситуација, која се создаде по фудбалскиот натпревар помеѓу Албанија и Србија во Белград.
Како што пренесуваат албанските медиуми, американскиот сенатор се сретнал и со претседателот на Албанија, Бујар Нишани кој ја пофалил улогата на САД за регионалниот мир и стабилност. Изразувајќи благодарност за учеството на Албанија во операциите на НАТО во Авганиста и Ирак, Марфи рекол дека Албанија без оглед што е мала држава, е еден од најголемите сојузници на САД, пренесе албанска „АТА“.
Е. Г.