Претставникот на американскиот Стејт департмент, Брајан Хојт Ји денеска во Блед изјави дека интеграцијата и трансформацијата на Западен Балкан е во интерес на Брисел и на регионот и додаде дека во моментот недостасува подготвеност за тоа од страна на европските институции.
Тој истакна дека ЕУ можеби е најважната поединечна сила за остварување на просперитет и мир во Европа и оти земјите од регионот мора да поседуваат максимална волја за трансформација со цел да станат членки на Унијата.
– Меѓутоа, некои земји од Балканот не донеле таква одлука и не се до крај определени за членство во ЕУ… Тоа е двостран процес и ЕУ мора целосно да биде подготвена да ги прифати оние кои треба да се трансформираат, а тие земји треба да бидат сигурни сто отсто дека сакаат да бидат дел од ЕУ, а не 50 проценти, посочи заменик помошникот на државниот секретар на САД за Европа и Азија.
Тој додаде дека е „сосема возможно земјите од Западен Балкан да останат надвор од ЕУ, иако е од витален интерес ЕУ да ги има како членки“.
Бледскиот стратешки форум, на кој учествуваа над илјада учесници од 70 држави заврши вечерва. Дводневниот собир помина во дискусии за иднината на ЕУ во изменетиот свет, ситуацијата во регионот на Западен Балкан и перспективите за членство во Унијата, но и за најактуелните светски теми, како што е кризата на Корејскиот Полуостров.