Генералното собрание на Обединетите нации денеска одржа седница на која се расправаше за резолуцијата за геноцидот во Сребреница, која беше усвоена со 84 гласа „за“.
Од друга страна, 19 земји гласаа против, а 68 земји беа воздржани.
За потсетување, најважните делови од резолуцијата се содржани во седум точки, и тоа:
Генералното собрание донесе одлука да го прогласи 11 јули за Меѓународен ден на сеќавање и комеморација на геноцидот во Сребреница во 1995 година.
Таа безрезервно го осудува секое негирање на геноцидот во Сребреница и ги повикува земјите-членки да ги зачуваат утврдените факти, вклучително и преку образовните системи преку развивање соодветни програми, исто така со цел да се запамети, да се спречи негирање и искривување на геноцидот.
Безрезервно ги осудува акциите што ги величат осудените воени злосторства, злосторствата против човештвото, вклучително и оние кои се одговорни за геноцидот во Сребреница
Ја нагласува важноста од завршување на процесот на пронаоѓање и идентификување на преостанатите жртви на геноцидот во Сребреница и повикува на продолжување на кривичното гонење на оние сторители на геноцид кои допрва треба да се соочат со правдата
Ги повикува сите држави целосно да се придржуваат кон своите обврски од Конвенцијата за спречување и казнување на злосторството геноцид
Бара од генералниот секретар да воспостави информативна програма под името „Геноцид во Сребреница и ОН“, со што ќе ги започне своите активности за одбележување на 30-годишнината од геноцидот
Ги поканува сите земји-членки, организации на системот на ОН, невладини организации и академски организации да го одбележат Меѓународниот ден, вклучително и организација на специјални активности за комеморација и чест на жртвите на геноцидот во Сребреница во 1995 година, како и соодветно образование и активности поврзани за подигање на јавната свест за геноцидот
Иницијативата за усвојување на Резолуцијата за Сребреница ја покренаа Босна и Херцеговина, Германија и Руанда. Во меѓувреме, како резултат на значителна дипломатска активност, на земјите им се приклучија Албанија, Австрија, Бангладеш, Белгија, Босна и Херцеговина, Бугарија, Канада, Чиле, Хрватска, Данска, Естонија, Финска, Франција, Германија, Ирска, Италија, Јордан, Лихтенштајн, Литванија, Луксембург, Малезија, Холандија, Нов Зеланд, Северна Македонија, Полска, Руанда, Словенија, Шведска, Турција, Велика Британија и Соединетите Американски Држави.