Специјалниот претставник на САД за Западен Балкан Габриел Ескобар денеска изјави дека српската заедница на Косово страда поради указот за забрана на динарите на таканаречената Централна банка на Косово и дека се потребни итни решенија.
Ова го изјави при посетата на Пеќ каде се сретна со месната српска заедница од Гораждевац и додаде дека на средбата можел од прва рака да слушне како таа одлука влијае врз нив.
„Овде постои заедница која навистина страда. Има луѓе кои се соочуваат со вистински проблеми поради немањето можност да добијат пензии. Затоа, навистина сакам да работам со владата на Косово со надеж дека ќе се обидам да изнајдам итно решение“, рече Ескобар.