Европскиот комесар за проширување на ЕУ, Штефан Филе изјави синоќа дека дошол во Белград за да ја охрабри Србија да продолжи во донесување на храбри одлуки и визијата на патот кон ЕУ.
-Дојдов за да честитам за она што го постигнавте во последно време, на вашиот европски пат, да изразам поддршка и да ве охрабрам да продолжите во тој правец-изјави Филе.
Тој дојде во Србија, недела дена по постигнувањето на договор помеѓу Белград и Приштина и неколку дена по препораката на Европската комисија за започнување на преговорите на Србија и ЕУ.
Европскиот комесар наведе дека во текот на посетата ќе разговара за идните чекори на Србија на европскиот пат, како што е и имплементацијата на договореното, но и дека ќе се фокусира на реформите.
-Утре на конференција ќе разговараме за различни прашања, вклучувајќи и борба против корупција и реформите во правосудството-најави тој.
Европскиот комесар кој на новинарите најпрвин им се обрати на српски јазик, им нагласи дека ова се важни денови за Србија и нејзините граѓани.
Тој им се заблагодари на граѓаните и изрази задоволство што има можност да биде дел од пишувањето нова историја на Србија.
-Ова не е посебен момент само за Србија, туку и за ЕУ и мене лично-заклучи тој.
Елена Георгиевска