На седница на Советот за надворешни работи на Европската унија повторно е изразена загриженост поради немањето напредок на Босна и Херцеговина на патот кон Европската унија.
– БиХ е единствената земја од регионот на Западен Балкан која не напредува на европскиот пат, констатирано е на седницата на Советот, со која претседаваше високата претсатвничка на ЕУ за надворешни работи и безбедносна политика Кетрин Ештон.
Советот изрази загриженост поради тоа што лидерите на БиХ и по три години не ја имплементирале одлуката на Судот за човекови права во Стразбур во случајот Сејдиќ-Финци, што значи дека БиХ ги крши меѓународните обврски и побара политичките лидери да се договорат за спроведување на пресудата под итна постапка.
Со спроведување на пресудата во случајот Сeјдиќ-Финци овозможува елиминирање на националната дискриминација од изборниот процес.
– Советот е загрижен поради можните последици до кои може да дојде на изборите во 2014 година и уште еднаш апелираме до БиХ тоа да го сфати како приритет за усогласување на Уставот со Европската конвенција за човекови права. Исто така, неопходно е да стапи во сили Договорот за стабилизација и асоцијација, заклучено е на седницата.