Надворешно-политичкиот сегмент на БиХ е целосно уништен, изјави денеска претседателот на СНСД, Милорад Додик, нагласувајќи дека затоа оваа политичка партија ќе поддржи смена на министерот за надворешни работи Елмедин Конаковиќ од Советот на министри.
– Претседателството на БиХ е „избркано“ од надворешната политика, бидејќи дејствува лично. Личните постапки на Конаковиќ и другите бошњачки претставници доведуваат до колапс на довербата во институциите, рече Додик на прес-конференција по седницата на Главниот одбор на СНСД.
Додик нагласи дека личните постапки го поткопуваат Уставот на БиХ и можноста државата да продолжи да функционира.
– Ваквите акции и политички притисоци се дел од континуитетот од постоењето на Република Српска. Тоа го трпеа сите поранешни претседатели на Република Српска, од Радован Караџиќ, Мирко Шаровиќ, Никола Поплашен, Билјана Плавшиќ, до актуелните претставници на највисоките институции во Република Српска, рече Додик.