Честитките што ги испрати американскиот претседател Џо Бајден до членовите на Претседателството на БиХ по повод 25 ноември, кој се слави како Ден на државноста на БиХ, се своевидна провокација, изјави лидерот на босанските Срби, Милорад Додик.
Еден ден откако Претседателството на Босна и Херцеговина доби честитка од Вашингтон по повод Денот на државноста, во која американскиот претседател истакна дека САД силно го поддржуваат интегритетот и суверенитетот на Босна и Херцеговина, Додик реагираше коментирајќи дека ова не е ништо друго освен некаква провокација.
„Сите вработени во американската амбасада знаат дека 25 ноември не е празник на Босна и Херцеговина“, изјави Додик, цитиран од локалните медиуми.
Босна и Херцеговина го слави Денот на државноста на 25 ноември како национален празник, на денот кога на седницата на Националниот антифашистички совет (ЗАВНОБиХ) во 1943 година беше потврдена државноста на Босна и Херцеговина како идна федерална единица во рамките на социјалистичка Југославија.