Турскиот претседател Реџеп Таип Ердоган изјави дека Владимир Путин има фер пристап кога станува збор за евентуална турска воена операција во Сирија.
Путин, како што рече Ердоган, ја поддржува Турција во борбата против тероризмот.
На враќање од Сочи, каде вчера разговараше со рускиот претседател, тој на новинарите во авионот, на прашањето за воената операција, им рекол дека Путин секогаш ќе биде со Турција во борбата против тероризмот, пренесе Спутник.
Ердоган најави и дека му предложил на претседателот на Русија да ја организира неговата средба со украинскиот лидер Володимир Зеленски.
„И покрај сите тешкотии на теренот, цврсто верувам дека украинската криза ќе се реши на преговарачка маса. Уште еднаш му спомнав на претседателот Путин дека можеме да ја организираме неговата средба со Зеленски“, рече Ердоган.