Полицијата во Сараево денес уапси 43-годишен маж под сомнение дека уби две лица, а локалните медиуми известуваат дека жртвите беа неговата мајка и брат, кои ги уби на крајно брутален начин.
Уапсениот во медиумите е идентификуван како Аднан Локванчиќ. Тој е уапсен во семејниот стан во сараевската населба Храсница, каде што полицајците го пронајдоа по добиена дојава.
Од полицијата кратко соопштија дека тој е приведен под сомнение за убиство на еден маж и една жена, како и дека е во тек истрага за да се утврди што точно се случило.
Според порталот „Дневни аваз“, Локванчиќ наводно ги уби својот брат и мајка со удари од лопата. Потоа ѝ ја отсече главата на мајката.
Неговиот адвокат Омар Мехмедбашиќ за медиумите потврди дека жртвите се мајката и братот на уапсениот, а веднаш најави и дека ќе побара психијатриско вештачење.
– Очигледно постојат причини за вештачење од невропсихијатар, бидејќи за време на исказот тој рече дека ги испрати мајката и братот, кои ги уби, кај шехидите и на подобро место – изјави Мехмедбашиќ за порталот „Кликс“.
Шехиди во исламската традиција се маченици, односно луѓе за кои се верува дека загинале бранејќи ја својата религија, заедница, татковина или невини луѓе.
Во Босна и Херцеговина, овој термин најчесто се користи за муслимани кои загинале во војната.
Медиумите известуваат дека семејството во кое се случи оваа трагедија имаше многу тежок живот, а дополнителна траума претставува фактот што таткото извршил самоубиство активирајќи рачна бомба, по војната во деведесеттите.