Прашањето за нова територијална поделба на Албанија се чини ќе биде нов камен на сопнување меѓу албанските владејачки социјалисти и опозицските демократи.
На последната пленарна седница на албанскиот законодавен дом, по барање на демократите на Љуљзим Баша, беше изгласана комисија за ова цел, како возврат за дадената поддршка на демократите за уставните измени за продолжување на мандатот на телата за ветинг во правосудството.
Баша веќе ги почна средбите на кои тој оцени дека новата територијална поделба е „извонредна можност да се воспостави локална власт во служба на народот“.
-Преку иницијативата на Демократската партија за да ја почнеме работата за новата територијална реформа во албанскиот парламент, имаме должност да му дадеме на народот локална власт поблиска до него и само во нивна служба“, рече Баша на средба со експерти од оваа област одржана во Тирана и најави средби и со граѓанитеза да го чуе нивното мислење.
Од друга страна премиерот Рама изгледа е против идејата на Баша за новата територијална реформа да се зголеми бројот на локални единици, и изјави дека и постојните се многу.
-Мислам дека треба да има помалку локални единици, но и покрај тоа секогаш сум со отворен став да влезам во дискусии со опозицијата. Комисијата е таму да разговара за сето ова и да го направи најдоброто за државата. Верувам дека од наша страна ќе биде вредно да се соочат аргументите, да се слушаме и да дојдеме до заклучоци кои и служат на земјата, вели Рама.
Законот за териториална поделба во Албанија беше изгласан во 2014 година, кога од 361 останаа 61 општина. Тогаш демократите се залагаа за најмалку 80 општини.
Извор: МИА