Американскиот потпретседател Џо Бајден во авторскиот текст за „Фајненшл тајмс“ пишува дека Белград и Приштина постигнаа историски договор за нормализација на односите, предупредувајќи дека следните чекори нема да бидат едноставни.
– Србија и Косово беа заробени во длабока и огорчена борба се досега. Низ дијалог, соработка но и болни компромиси, премиерите Ивица Дачиќ и Хашим Тачи постигнаа историски договор за нормализација на односите. Следните чекори нема да бидат едноставни, но со тоа лидерите им дадоа на своите граѓани извондредна шанса да ја изградат иднината врз основа на почитување на правото, заедничкиот просперитет и мирна коегзистенција, пишува Бајден.
Тој во текстот ги фали и напорите на Загреб, кој резултираа со влезот на Хрватска во Европската унија.
Бајден наведува и дека Црна Гора и Албанија забележале напредок на патот кон ЕУ, додека Македонија треба да продолжи со реформите и решавањето ан меѓуетничките проблеми и заедно со Грција да собере храброст за решавање на спорот со името.
Американскиот потпретседател осврнувајќи се на Босна и Херцеговина нагласи дека земјата нема никаков напредок и оти „народот заслужува повеќе“.