Атина оваа година нема пари за новогодишна елка, откако лани Грците ја имаа најголемата во Европа, објави порталот „ГрикРипортер“.
Градските власти во Атина го намалија за 90 проценти буџетот, кој е наменет за празниците оваа година и се откажаа од традиционалното украсување елка на плоштадот Синтагма. Скромно ќе бидат украсени со сијалички само неколку поголеми булевари и плоштади.
– Грција ја завршува петтата година на рецесија и се движи кон шестата, со намалување на платите и пензиите и зголемување на даноците, така што многу луѓе се откажуваат од празнувањето на Нова Година или планираат да прослават дома со семејството, каде секој ќе донесе по нешто за трпезата, наведува грчкиот портал.
Во 2010 година елката на плоштадот Синтагма беше потпалена од демонстранти по воведените први мерки за штедење, кои меѓународните кредитори ги побараа од Грција. Минатата година властите во Атина ја поставија најголемата новогодишна елка во Европа во обид да покажат барем малку оптимизам.