Амбасадата на Соединетите Американски Држави во Приштина им порача на косовските државјани и политички фактори да ги остават настрана етничките поделби и да се посветат на борбата против епидемијата на Ковид-19.
Во изјава за медиумите на групацијата „Коха“, американската Амбасада им оддаде признание на здравствените работници во нивното соочување со заразата и ги повика граѓаните на Косово да помогнат во справувањето со коронавирусот, на тој начин што ќе ги следат препораките на професионалнците.
– Им оддаваме признание за постојаните напори на здравствените професионалци и на останатите кои работат многу, под голем ризик, за да го спречат ширењето на Ковид-19 во Косово. Тие имаат потреба од поддршка од сите. Работењето заедно, следејќи ги препораките на здравствените професионалци, и оставањето настрана на поделбите во заедницата, се суштествени за совладувањето на Ковид-19, се вели во одговорот на дипломатското претставништво на САД упатено до „Коха“.
Во Косово се отвори дебата околу вчерашната информација дека во општините со мнозинско српско население во северно Косово, Северна Митровица и Звечане, е воведен карантин по указ на властите од Србија. Претседателот на државата Хашим Тачи и косовските опозициски партии тврдат дека тоа е доказ за неспособноста на Владата во оставка, предводена од Албин Курти, да воспостави власт на територијата на целата земја, додека Владата инсистира дека мерките се воведени од страна на косовското Министерство за здравство.
Во видео-обраќање до граѓаните на Косово, Курти денеска ги обвини, како што рече, „одредени високи државници и политичари во Белград и Приштина“, дека сакаат да предизвикаат конфликти и крвопролевање во северно Косово, со цел да ги реализираат нивните планови за размена на територии и поделба на Косово.