Претседателот на Република Албанија, Илир Мета е пречекан денеска со државни почести во Приштина од косовската претседателка Вјоса Османи, на неговата последна официјална посета на една земја како претседател, јави дописникот на МИА од Приштина.
По средбата во кабинетот на Османи предвидена е заедничка прес-конференција на двата претседатели, по што Мета ќе се сретне и со собранискиот спикер, Глаук Коњуфца и ќе се обрати на пратениците во законодавниот дом на Косово.
За време на престојот во Приштина албанскиот претседател ќе се сретне и со косовскиот премиер, Албин Курти.
Според агендата, претседателите Мета и Османи вечерва во косовската престолнина ќе присуствуваат на свеченото отворање на културната манифестација „Манифеста 2022“.
Мандатот на Мета на чело на албанската држава завршува в недела, на 24 јули.
Извор: МИА