Модните индустрии Zara, Mango и H&M би можеле да го преместат производството на облека од Турција во други земји, пишува руски Комерсант.
Компаниите веќе побарале отстранување на ознаките „Произведено во Турција“, од облеката која се шие во земјата, веројатно поради можните потешкотии во продажбата на рускиот пазар.
Комерсант наведува дека Русија следната недела би можела да ги прошири санкциите против Турција, пренесува Б92.
„Очекуваме усвојување на резолуцијата следната недела, иако на основа на политички консултации, одлуката може да биде одложена“, изјавил извор од руското министерство за економија, кој не ја исклучил можноста од тоа новите санкции да стапат на сила до Нова година.
Драматичните компликации во односите меѓу Турција и Русија настапија откако турски авион на 24-ти ноември собори руски бомбардер кој учествуваше во операцијата на Москва против Исламска држава, пришто загина еден руски пилот.
После овие случувања, рускиот претседател Владимир Путин потпиша уредба со која се забранува увоз на бројни турски производи.