Супер појадок, богато предјадење или идеја за вечера. Изгледа многу примамливо, па со гордост може да ја направите и покажете пред најблиските.
Потребно е:
500 гр лиснато тесто
2-3 чешниња лук, истолчени
1-2 главици кромид, ситно исечани
150 гр кашкавал, изрендан
1 помал страк праз
50 мл кечап
250 гр јунешко мелено месо
250 гр свинско мелено месо
30 гр семки од сончоглед
прстофат оригано
4 лажици масло
2 јајца (едно ја филот, а друго за премачкување)
сол и бибер
Подготовка:
– Лиснатото тесто оставете малку да се опушти на соба температура додека го подготвувате филот.
– Празот исечкајте го на ситно.
– Кашкавалот изрендајте го.
– Во тавче за пржење ставете го маслото да се загрее. На загреаното масло ставете ги празот и кромидот да се пропржат, т.е да омекнат.
– Кога ќе омекнат, додадете го месото и пржете додека да не порумени. Во месото ставајте по малку вода, по потреба и гответе го додека да испари целата вода.
– Пред крај ставете ги кечапот, лукчињата, ориганото и зачинете со сол и бибер. Измешајте и гответе кратко додека да испари течноста (не треба да има ни малку течност, затоа што ќе го раскашави тестото).
– Готовиот фил оставете да се олади и во оладениот фил ставете едно јајде и ренданиот кашкавал. Измешајте за да се соедини убаво.
– Лиснатото тесто развлечете го со сукало со дебелина од 0,5 см.
– Филувајте го со подготвениот фил, нанесувајќи го на целото тесто.
– Потоа, завиткајте го филуваното тесто како ролат. Ролатот исечете го на поголеми триалогници.
– Триаголниците наредете ги во тркалезна тава за печење обложена со хартија за печење, во круг, премачкајте ја погачата со изматено јајце, посипајте со сусам и семки од сончоглед и ставете да се пече во рерна загреана на 200 целзиусови степени, додека да порумени (околу 30 до 35 минути, во зависност од рерната).