Меко тесто како основа, јаболки, а најодозгора крцкаво, ронливо тесто. Навистина неодоливо…
Потребно е:
за ронливото тесто:
140 гр брашно
1/2 лажиче прашок за пециво
100 гр путер
125 гр шеќер
за филот од јаболки:
3 големи јаболки (или 5 помали)
20 гр путер
2 лажици кафеав шеќер
1/2 лажиче цимет во прав
за тестото:
100 гр путер
100 гр шеќер
1 јајце
150 гр брашно
1 лажиче прашок за пециво
1 лажица млеко
Подготовка:
– За ронливото тесто ставете го во еден сад брашното и прашокот за пециво. Додадете го шеќерот и путерот исецкан на ливчиња. Со раце замесете го тестото за да се соединат путерот и брашното. Ќе добиете ронлива смеса. Ставете ја во фрижидер додека ги подготвувате другите состојки.
– Излупете ги јаболките и исецкајте ги на коцкички. Ставете ги во тава во која сте го ставиле путерот со кафеавиот шеќер и циметот. Загревајте ги на повисока температура 1-2 минути со постојано мешање додека не се растопат путерот и кафеавиот шеќер. Потоа смалете ја температурата, поклопете и оставете да се динстаат на тивко околу 5 минути, за да омекнат.
– За тестото, изматете го со миксер омекнатиот путер со шеќерот додека не стане пенест. Додадете го јајцето и повторно убаво изматете. На крај додадете ги брашното и млекото со постојано матење.
– Правоаголна тава со димензии 20х30 см обложете ја со хартија за печење. На дното распоредете го тестото и израмнете го. Над тестото распоредете ги јаболките, а над нив распоредете го ронливото тесто.
– Колачот ставете го да се пече во загреана рерна околу 40 минути. Готовиот колач оставете го да се излади и дури тогаш пресечете го на коцки. Пред да го послужите посипете го со шеќер во прав.