Фини, вкусни, меки кифлички со полнење по желба …
Потребно е (за 88 кифлички):
1 кг брашно
1 лажиче сол
1 чаша (200 мл) млеко
1 коцка свеж квасец
1 јајце
400 гр маст (или путер)
1 лажица шеќер
изрендана кора од 1-2 лимони
Подготовка:
– Брашното ставете го во подлабок сад и додадете ја и солта.
– Во друг сад издробете го квасецот, додадете 1/2 лажиче шеќер и прелијте со топло млеко. Оставете го квасецот на топло за да стаса.
– Во садот во кој ќе го месите тестото ставете ја маста (или путерот) на собна температура за да омекне. Потоа со една дрвена лажица изматете јас убаво маста со 1 лажица шеќер. Додадете го јајцето и повторно убаво измешајте.
– Сега во садот сипете го стасаниот квасец, изренданата кора од лимон и измешајте.
– Соединете ги сите состојки и со постепено додавање од брашното замесете меко и мазно тесто кое не треба да ви се лепи на рацете.
– Рерната загрејте ја на 180 целзиусови степени, а големата тава од рерната обложете ја со хартија за печење.
– Тестото поделете го на 11 делови. Секој дел развлечете го со сукало во форма на круг со дебелина околу 1/2 см. Секој круг исечете го на 8 триаголници (како на сликата). Филувајте ги со мармалад по желба. Замотајте ги, но внимавајте да не излезе филот надвор од тестото и затоа внимателно стиснете ги краевите од тестото. На крај секоја кифличка малку заоблете ја.
– Готовите кифлички наредете ги на хартијата за печење во тавата, но оставете простор меѓу нив затоа што ќе нараснат додека се печат.
– Ставете ги да се печат. Нама многу да поруменат и затоа за да проверите дали се печени подигнете една кифличка со нож и видете го долниот дел. Ако е фино печено и румено значи дека се готови и извадете ги од рерната.
– Врелите кифлички увалкајте ги во шеќер во прав, оставете ги да се изладат и послужете ги. Можете да ги чувате повеќе денови во метална кутија.