Иако следното издание на Евровизија ќе се одржи во мај 2025 година, Кипар одлучи да го објави името на својот претставник.
Според официјалниот портал на Евровизија, станува збор за младиот сестран уметник Тео Еван, кому ова ќе му биде првпат да се појави на овој престижен музички натпревар.
„Пејач и танчер од седумгодишна возраст и текстописец од тинејџерските години, патувањето на Тео Еван до Евровизија ќе биде последното поглавје во приказната за уметникот кој отсекогаш ја имал својата страст за музиката“, напишаа тие. .
Почнал да танцува како момче, пеел во училишниот хор и настапувал во разни претстави и талент шоуа на Кипар, каде често добивал награди и признанија.
Тие понатаму наведуваат дека дипломирал на Англиското училиште во Никозија, а потоа се преселил во САД за да студира музика на познатиот музички колеџ Беркли во Бостон.
Тој го издаде својот прв сингл „The Wall“ во 2021 година, а потоа следуваа песните „Burn Us Down“, „So Cold“, „Save Me From Myself“ и „Dark Side“. Сепак, песната што следната година ќе го претставува Кипар се уште не е објавена.
Инаку, ова ќе биде 41-ви пат Кипар да се натпреварува на Евровизија, а најдобриот резултат земјава го постигна во 2018 година, кога Елени Фуреира го освои второто место со песната „Фуего“.
По овогодинешната победа на Немо со песната „The Code“, Швајцарија ќе биде домаќин на 69. издание на Евровизија. Натпреварот ќе се одржи во Св. Јакобшале во Базел. Полуфиналните вечери ќе се одржат на 13 и 15 мај, а големото финале е закажано за сабота, 17 мај.