Поранешната премиерка на Финска Сана Марин одлучи да ги отфрли оделата и свечената облека што се карактеристични за политичарите и скокна во послободна облека. На Инстаграм таа објави неколку фотографии од музичкиот фестивал Flow кој се одржа во Хелсинки од 11 до 14 август.
Сана, неколку месеци по разводот, позираше во неколку изданија – црн полупроѕирен фустан, розов тесен фустан и кожено мини здолниште и топ. Изгледа дека таа се посвети на приватниот живот и забавите по поразот на парламентарните избори во Финска.
Претходно Сана беше критикувана поради видеата од забавите на кои често одела додека била премиерка. На едно од видеата се гледа како Марин танцува во четири часот наутро во клуб во Хелсинки, а имаше тврдења дека таа и нејзината придружба користеле дрога. Сана потоа беше тестирана за дрога и имаше негативен резултат.
“А јас сум само човек. Ја работам својата работа. Научив од ова… Се надевам дека луѓето внимаваат на работата што ја работиме, а не на она што го правиме во слободното време”, коментираше таа еднаш.
Поранешната финска премиерка пред повеќе од два месеци објави дека се разведува од сопругот Маркус Раиконен со кој беше во брак три години и во врска вкупно 19 години. „Благодарни сме за 19 години заедно и нашата сакана ќерка. Ќе останеме најдобри пријатели“, објави Сана на својот Инстаграм профил.