Актерките Кирстен Дунс и Ванеса Паради, актерот Доналд Сатерланд и режисерот Арно Деплешен ќе бидат во жирито на 69. Меѓународен филмски фестивал во Кан, соопштија организаторите.
Во жирито, со кое претседава австралискиот режисер Џорџ Милер, уште ќе бидат и италијанската режисерка Валерија Голино, младиот унгарски режисер Ласло Немаш, данскиот актер Мадс Микелсен и иранската продуцентка Катајун Шахаби. Од девет членови на жирито, четири се жени.
Вкупно 20 филмови ќе се натпреваруват за престижната награда Златна палма на овогодинешниот кански филмски фестивал кој трае од 11 до 22 мај. На списокот на филмови се наоѓа и филмот „Џулијета“ на шпанскиот режисер Педро Алмодовар, „The last Face“ на американскиот режисер Шон Пен и „Paterson“, Џим Џармуш.
Фестивалот ќе го отвори новиот филм на Вуди Ален „Cafe Society“, со Кристен Стјуарт и Џеси Ејзенберг во главните улоги.