Нискобуџетниот филм „Бруталист“, драма за поединец кој го преживеа холокаустот, е големиот победник со три награди на овогодинешното 82-то доделување на Златните глобуси.
„Бруталист“ е прогласен за најдобар филм во категоријата драма, Адриен Броди ја доби наградата за најдобар актер за улогата во тој филм, а Бренди Корбет за најдобар режисер, пренесува Гардијан.
Броди, кој претходно го изгуби Златниот глобус за „Пијанист“ пред да го добие Оскарот, го нарече филмот „приказна за човечката креативност“.
Тој рече дека мисли дека ваква можност никогаш повеќе нема да му се укаже, а потоа додаде дека се надева дека филмот ќе ги инспирира имигрантите. Крими-мјузиклот на Нетфликс „Емилија Перез“, филмот со најмногу номинации, донесе четири награди: најдобар филмски мјузикл или комедија, најдобра споредна женска улога за Зои Салдана, најдобра оригинална песна и најдобар филм на јазик различен од англискиот.
Во категоријата најдобра актерка во драма, бразилската ѕвезда Фернанда Торес ги победи Никол Кидман, Анџелина Џоли и Кејт Винслет, за улогата во драмата „Јас сум уште тука“. Деми Мур ја доби наградата за најдобра женска улога во мјузикл или комедија за филмот „The Substance“, а во машка конкуренција триумфираше Колин Фарел за улогата во спин-оф серијата за Бетмен, „The Penguin“.
По освојувањето на наградата Еми, актерката Џоди Фостер годинава го освои својот петти Златен глобус во категоријата најдобра актерка за улогата во серијата „Вистински детектив: Ноќна земја“.
Златните глобуси, американска филмска награда што ја доделува Холивудската асоцијација за странски печат (HFPA) од 1944 година, често е показател за тоа кои филмови ќе бидат наградени со престижната награда Оскар.