Најбогатиот човек на светот, Илон Маск, татко на десет деца, им порачува на луѓето да “прават повеќе бебиња”.
„Верувајте ми – кризата со бебиња е голема работа“, рекол 51-годишниот бизнисмен пред новинарите во Ставангер, на југозападот на Норвешка, каде би требало да присуствува на енергетска конференција.
Запрашан за најголемите предизвици со кои светот се соочува, основачот на “Tesla” секако го навел преминувањето на обновливи извори на енергија, но веднаш продолжил со наталитетот.
Како што навел, наталитетот е “една од неговите главни грижи, можеби помалку познати”.
„Важно е луѓето да имаат доволно бебиња за да ја одржиме цивилизацијата“, смета Илон Маск.
Откако пристигнал во Ставангер со приватен авион, Илон Маск исто така рекол дека на Земјата и натаму и се потребни извори на фосилни горива.
„Мислам дека реално мораме краткорочно да користиме нафта и гас, бидејќи во спротивно цивилизацијата би пропаднала – посебно овие денови со санкциите кон Русија“, додал Маск.