Премиерата на претставата „Грдото пајче“ од Ханс Кристијан Андерсен во режија и драматизација на Деан Дамјановски утревечер во 19 часот ќе биде изведена во Театарот за деца и младинци – Скопје.
Директорот на Театарот за деца и младинци – Скопје Драган Довлев на денешната прес-конференција рече дека идејата за да се постави оваа претстава е на Деан Дамјановски.
– „Грдото пајче“ кај нас досега не било поставено, а е примамливо како наслов. Се работи за класична детска бајка, со визуелен ефект, која ќе може лесно да се следи, рече Довлев.
Тој изрази надеж дека децата ќе бидат задоволни и оти со „Грдото пајче“ ќе настапуваат на многу фестивали.
Дамјановски информира дека „Грдото пајче“ е на ниво на претставите на Театарот за деца и младинци – Скопје.
– „Грдото пајче“ се гледа во еден здив. Во претставата доаѓаат до израз актерската игра, визуелните ефекти, музиката и танцот. На сцената ќе се видат и ликови кои ги нема во оригиналната верзија, рече Дамјановски и додаде оти се работи за еден тип на басна бидејќи животните зборуваат.
Во претставата учествуваат Емран Куртишова, Марија Ѓорѓијовска, Изабела Новотни, Бојан Кирковски, Мартин Јорданоски, Татјана Павловска Кочовска, Мики Анчевски и Предраг Павловски. Костимографијата е на Елена Дончева, а сценографијата на Кирил Василев. Музиката е на Љупчо Мирковски, а кореографијата на Сања Шутевска. Костимите ги изработиле Љубица Велкова, Ирена Танчева и Зејнеп Адиловска.
На сцената на Театарот за деца и младинци – Скопје досега се изведени повеќе дела од Андерсен, „Снежната кралица“, Девојчето со кибритчиња“ и „Малата сирена“.