Модната креаторка Антонија Ристовска синоќа во Скопје ја претстави својата нова колекција пролет/лето 2014 со којашто го одбележа и 20 годишниот јубилеј од својата работа.
– Во создавањето ме водеше потребата за промена и за нов модерен изглед на жената од денешницата. Промената што е предизвикана од Арт Деко движењето, како архитектура на орнаменти, геометрија, енергија, ретроспектива, оптимизам, боја, текстура, светлина и некогаш дури и како симболизам. Во креациите се забележува тродимензионалност, искажана длабочина и текстура во самите апликации. Кроевите ја нагласуваат женственоста изразена преку строги и меки линии. Изразени се контрасти во комбинирањето на боите и материјалите, вели Ристовска за колекцијата.
Стилски колекцијата е минималистичка и е во духот на 60-тите и 80-тите години. За колекцијата се изработени и брендирани копчиња и парчиња накит.
Ристовска досега има дизајнирано 20 колекции и организирано 15 ревии во Македонија, Косово и во Турција.