Советничката група на ВМРО-ДПМНЕ има очигледна намера да ја блокира работата на општина Центар, изјави градоначалникот Андреј Жерновски, по маратонската седница на Советот, која заврши околу 8 часот утрово.
Поднесени се голем број на амандмани на Ребалансот на буџетот и со тоа им се прави директна штета на граѓаните, вели Жерновски.
„Сакам уште еднаш јасно да кажам, дека на дневен ред не е стопирање на изградба на црквата„Свети Константин и Елена. И затоа не можам да сфатам зошто протестираа граѓаните. Денеска требаше да имаме средба со Архиепископот Охридски и Македонски г.г. Стефан, која е откажана, поради познатите причини“, рече Жерновски.
Не можам, да разберам, рече зошто Општината е под опсада. Вчера додека имаше протести и се кршеше и се фрлаше се, имавме повторно управна инспекција. Се надева дека ќе се вразумат, бидејќи тука не се работи за црква и ДУП-ови, туку за демократијата.
Ова е лоша слика и имиџ за Македонија. Централната власт, рече Жерновски мора да ја прифати реалноста.
Инаку ова се плановите и снимките кои градоначалникот Андреј Жерновски, ќе му ги покаже на г.г. Стефан.
На нив јасно се гледа дека постои црквата Св. Константин и Елена и тоа со иста површина и со исти параметри.
Според Жерновски, во скоро време ќе почне уништувањето на паркот помеѓу хотел „Бристол“ и „Рамстор“.
– Планирано е сечење на дрва и нелогично градење на една висококатница. Сакам тоа да го спречам. Добив доверба да се спротивставам на ова узурпирање, сметам дека имам добиено поддршка од граѓаните. Тоа не значи дека имам намера да го уривам тоа што е веќе изградено, рече Жерновски.
Петар Клинчарски