Лидерот на ЛДП, Андреј Жерновски најостро реагира на игнорантскиот и понижувачки однос на премиерот Груевски и министерот за здравство Тодоров , но за жал и на дел од медиумите, кон штрајкот на лекарите.
„Премиере, министре, денеска видовте дека, колку и да се трудите да ја убедите јавоста дека не постои, штрајк постои, лекарите ви покажаа дека не се невидливи, туку дека тоа се луѓе со име и лик, луѓе образовани и луѓе од чија добра работа зависи животот на сите нас.Министре, не ги затворајте очите и не ја пикајте главата како ној во песок пред проблемот. Овие луѓе се на страната на вистината, науката, здравството, но пред се на страната на сите граѓани, особено пациентите“, пишува Жерновски во реакцијата.
Престанете, вели, со заканите и притисоците, зошто лекарите не се фела која се плаши.
„Ако вие вчера, на маратонската седница, зборувавте за се и сешто, и додека се обидовте да ја замајувате јавноста со розовата состојба во здравството и големите идеи за реформи, не најдовте време ни една секунда да споменете дека 1.400 специјалисти, на кои им се придружува веќе и другиот медицински персонал, се револтирани од Вашиот однос, дека бараат само услови за работа и соодветно вреднување.Министре, лекарите не работат во фабрика за произведување клинци, па да барате од нив работа на парче, па така да ги наградувате или казнувате. Лекарската професија не се мери на парче. Таа е стручна и одговорна. Позначајно е една операција и еден спасен човечки живот, од вашите субјективни критериуми“, стои во реакцијата на лидерот на ЛДП.
Побара да се престане и со вршењето притисок врз медиумите да не објавуваат информации за она што се случува.
Штрајк има и за тоа јавноста треба да биде информирана. Како го исперете срамот дека главниот и одговорен уредник на „Дневник“, поднесе оставка, бидејќи забранивте и при самото печатење, исфрливте текст од весникот за штрјкот во здравството.Разбудете се и отворете ги очите, штрајк има, има и незадовослтво, но Вие треба да седнете и со лекарите да најдете заеднички јазик. Животот на луѓето е пред се!„, стои во реакцијата на Андреј Жерновски.