Државата ни стана дива лига, дива депонија и див запад каде што законот е само декларација на хартија, а институциите се евтина сценографија од стиропор. Напади се случуваат (без разлика дали жртвата е функционер или не) пред очите на полицијата, која претпочита да „не зазема страна“ без да добие директива од партиски штаб, наведуваат од иницијативата Зелен Хуман Град.
Нападите врз градоначалничката Данела Арсовска и службениците од Град Скопје најостро ги осудуваме, а уште повеќе ги осудуваме кукавиците од МВР, чие молчење и пасивност ја охрабруваат насилничката багра. Од една страна имаме партиски босови во блиндирани коли со лични шофери за секое кафе кои си усвоија закон за „безбедносни појаси“ околу Собрание, а од друга – секојдневни тепачки, убиства, сообраќајки и јавни закани за силување што ниту една институција на државата не се труди да ги спречи!
Партиските вработувања, слепото спроведување наредби, селективните казни и двојните аршини се причината зошто народот има нула доверба во полицијата. Ако немаш пари и партиска книшка, нема ни правда ни заштита за тебе. Во МВР сè уште има чесни професионалци кои се спречени да си ја вршат работата поради партиите, а некои се и злоупотребувани за партиски цели и интереси. Децениското уништување на иституциите нè доведе овде, до состојба во која дивјаштвото е правило, а редот е исклучок.
МВР, кога ќе ги уапсите и притворите дивјаците од Чаир?! Или чекате да убијат некого и да избегаат преку граница во багажник? НУЛА ТОЛЕРАНЦИЈА ЗА НАСИЛСТВО! ПОЛИЦИЈАТА Е ДОЛЖНА ДА ГО ШТИТИ ЈАВНИОТ РЕД И МИР, порачаа активистите на Граѓанска иницијатива ЗЕЛЕН ХУМАН ГРАД.