Заменик-министерот за надворешни работи на Република Македонија, Андреј Жерновски денеска престојуваше во еднодневна посета на Република Австрија, каде што се сретна со генералниот секретар на Сојузното министерство за Европа, интеграција и надворешни работи во Виена, Јоханес Петерлик.
Како што соопшти Министерството за надворешни работи, за време на средбата била поздравена одличната билатерална соработка меѓу двете земји како интензивираниот политички дијалог и соработката во повеќе сектори, со заложби за нивно натамошно унапредување.
Се разговарало и за тековниот реформски процес, внатрешно-политичката состојби во Република Македонија и одржувањето на претстојниот референдум.
– Иднината не може да ја промениме, но таа е во наши раце и убеден сум дека на 30 септември граѓаните ќе го препознаат историскиот момент за одлука, истакна заменик-министерот Жерновски.
Австрија како актуелен претседавач со Европската Унија, ја реафирмирала силната и континуирана поддршка во правец на реализација на нашите стратешки определби, кои се од исклучително значење за Република Македонија и регионот на Југоисточна Европа.
– По успешниот референдум, на кој сите се надеваме, Австрија би била подготвена значително и конкретно да ја зајакне поддршката во реформските процеси, особено во сегментот на безбедност и организираниот криминал, истакнал генералниот секретар Петерлик.