„Наш противник е ВМРО ДПМНЕ“, порача Зоран Заев на својот ФБ профил.
Ги повика сопартијците да се создаде чесен изборен амбиент а да победи најдобриот.
Еве ја пораката на Заев:
Почитувани подржувачи,
Јас, Зоран Заев во три изборни циклуси по ред го декласирам овој монструозен режим на ВМРО ДПМНЕ. Точно знам како да се изборам и да ги поразам гнасотиите на системот на Груевски. Не се повлекувам од ниту една битка, тоа не е моја карактерна особина.
Победнички менталитет ќе го пренесам и ќе стане доминантен и во мојата матична партија. Подготвен сум заедно со моите сопартијци да ја поведеме СДСМ во една многу посветла иднина. СДСМ како победничка партија. Ве уверувам, 2-ри Јуни е почеток на новиот СДСМ, но воедно и почеток на крајот на владеењето на ВМРО ДПМНЕ.
Сепак, за ова да се случи постои само еден суштински услов, што зависи од сите нас во СДСМ, a тоа е достоинствена и цивилизирана внатрепартиска изборна процедура. Јас до крај доследно и упорно ќе се залагам и ќе инсистирам на изборен натпревар базиран врз еднакви и фер услови, ослободен од секаков вид на притисоци, лобирања, групирања, поделби, кавги, непријателства. Само единствен, цврст, сплотен и моќен СДСМ може да му нанесе пораз на нашиот противник. Наш противник е ВМРО ДПМНЕ. Не се тоа нашите сопартијци, членови, делегати, колеги, симпатизери. Уште помалку се тоа конкурентите во овој изборен процес. Јас има целосен респект и почит кон останатите кандидати. Сите тие се мои драги пријатели и блиски партиски сооработници, а тоа ќе бидат и во иднина.
Почитувани членови на СДСМ, почитувани сопартијци. Ве повикувам да се издигнеме над предизвиците што се надвиснати на нас. Да создадеме амбиент за чесен, квалитетен и содржаен изборен амбиент. Нека победи најдобрата, најтемелната, највизионерската старатегија, програма, кандидат. Нека гласаат нашите делегати врз основа на сопствениот впечаток и убедување. Нека блесне новото, светло лице на СДСМ.
Некои велат, реагирам емотивно.Точно е, преемотивен сум кога е во прашање мојата партија и нејзината иднина. Како и досега, така секогаш, со жар и емоции, со љубов и искреност, но и со разум и темелност, со сериозност и посветеност, ќе се вложувам за нејзиниот успех.
Не ми треба претседателската функција, ако крај себе немам еден ваков СДСМ.