Индустриска зона, нови работни места за младите и поддршка од централната за локалната власт, ветија лидерот на СДСМ Зоран Заев и кандидатот за градоначалник Роберт Бешовски на денешниот митинг во Градско.
– Ќе ја промовираме индустриската зона овде во Градско. Конечна цел е да отвориме работни места. Градско е вистинска крстосница во Македонија, трансферзала север-југ, нема подобра локација за индустриска зона. Не само за да ни останат младите. Можеме да ја направиме општината привлечна и за домашни и странски инвеститори, рече Заев.
Пред жителите на Градско тој вети чесни политики и работење и на централно и на локално ниво.
Кандидатот за градоначалник на Градско, Роберт Бешовски, го претстави проектот за индустриска зона на локацијата кај регионалниот пат Градско – Неготино, на која, како што посочи, сега има само шут и ѓубре.
– Да направиме индустриска зона за мали и средни претпријатија, а ќе биде и откупен центар. Станува збор за површина од 56 декари. Руинираниот објект, се планира да биде реновиран во хотел, рече Бешовски и ги повика жителите на Градско да му ја дадат довербата во вториот изборен круг на 29 октомври.