На протесниот марш на СДСМ во Гостивар, поддршка му дадоа голем број граѓани од различни етнички заедници. Лидерот на СДСМ Зоран Заев, изјави дека мора да се почитуваат Уставот и законите во Македонија, каде се гарантираат правата и слободата на граѓаните, и не се омаловажува ниту една вера и нација.
– Уставот на Македонија е и Библија и Куран, тука не се навредуваат граѓаните со погрдни зборови, како шиптари, човечиња, цигани и слично. Затоа мора да ја вратиме слободата во Македонија преку почитување на законите загарантирани со устав, и нема да дозволиме некој да го урне мултиетничко општество, кое со векови постои во Македонија, изјави лидерот на СДСМ Зоран Заев.
Заев изјави дека голем дел од содржината на објавените аудио разговори се реализирани во пракса од страна на актуелната власт.
– ВМРО-ДПМНЕ вели дека разговорите кои ги објавуваме не се реализираат во пракса, а во реалноста е сосема поинаква сликата. Претходно го видовте скандалот во општина Центар, каде се кршеше зградата на локалната самоуправа, а потоа во снимките што ги објавивме слушнавте кој го креирал ова сценарио, исто така слушнавте и за местењето на судиите, кои сега веќе се избрани на високи судски функции, изјави Заев.
Заев изјави дека на Никола Груевски му се ближи крајот. Доказ за тоа е денешниот митинг на ВМРО ДПМНЕ во Охрид, каде премиерот Груевски држеше говор во полупразна сала.
Извор: Мета