Премиерот Заев најави дека ќе разговара со неговиот адвокатски тим дали да покрене тужба против Мицкоски во однос на вчерашната изјава по приведувањето на Вељаноски, Јанакиески и Ристовски.
„Јас сум од крв и месо, трнспарентен човек и нормален. Само ќе кажам забегана работа, затоа што се претера. Јас сум бил пред притвор, со одземен пасош, сум објавувал политички бомби, па сепак сум внимавал што зборувам. Тој иницира обиди за убиство и зборува за некоја жестокост, не знам каква. Тоа зборува за него, но во најмала рака е забегано“, истакна премиерот во однос на изјавата на лидерот на ВМРО-ДПМНЕ.
Во однос на средбата со Касами потврди дека се уште нема конкретен договор, но се надева дека голем дел партии ќе застанат зад предлогот за заеднички кандидат. Тој рече дека кандидатот ќе биде претставен идната недела на конгресот, по што ќе се знае кои политички партии ќе дадат поддршка.
„Имињата, анализите, односно рејтинзите се важен елемент за оваа одлука, јас се надевам дека ќе изнаједеме заеднички прифатливо решение, но сепак останува партиите внатре да си одлучат и да си го кажат своето, односно дали ќе застанат зад предлогот“, рече Заев.
Тој не сакаше да коментира дали Стево Пендаровски е најприфатливото име за албанскиот електорат и повика за трпение до наредната недела.
Додаде дека уште еднаш ќе направи обид да стапи во контакт со Зијадин Села и да најде начин да се надминат недоразбирањата со Тараври. Најавеното замрзнување на опозицијата за сите активноти во Собранието, го искоментира како чекор кој не е добар за државата и ги повика да се вклучат во процесите кои што ќе следат.
Во однос на судските одлуки и работата на обвинителството уште еднаш повтори дека нема намера да се меша во работата на судската власт.
„Нема да си дозволам да коментирам за работи кои што не се од моја надлежност. Исто така упатувам апел до сите од извршната власт да се воздржат од било каква изјава за судски одлуки. Мораме да ја промениме перцепцијата. Заев е премиер, тој не суди и не обвуинува“, посочи тој.
Во однос на прашањето за непотизам при вработувањата, особено за роднините на Кирацовски, Заев рече: „Кирацовски е одговорен и транспарентен и нема што да крие, јас повикав и одредени роднини на функционери се повлекоа, тоа е за поздравување. Ќе додадам дека не е прекршен ниту еден закон, но сепак во прашање беше етички однос“, кажа премиерот.
Габриела Димковиќ-Мишевска